بەڕێوەبەرایەتیی پۆلیسی دارستان و ژینگەی سلێمانی رایدەگەیەنێت، دوای ئاگاداركردنەوەی بنكەی پۆلیسی دارستان و ژینگەی تانجەرۆ لە بوونی ئاژەڵێكی كێوی بە برینداری، دەستبەجێ مەفرەزەیەك بەدواداچوونیان كرد و رێكخراوێكی تایبەت بە پاراستنی ئاژەڵانیان ئاگاداركردەوە كە چارەسەری پێویستی بۆ بكرێت.
بەپێی راگەیەندراوێكی بەڕێوەبەرایەتیی پۆلیسی دارستان و ژینگەی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، كە لەلایەن هاوڵاتییەكەوە بنكەی پۆلیسی دارستان و ژینگەی تانجەرۆ ئاگاداركرا بەبوونی ئاژەڵێكی كێویی كە بریندارە و زیندووە لە شەقامی سەرەكیی عەربەت -سلێمانی، دەستبەجێ مەفرەزەیەك گەیشتنە شوێنەكە و دەركەوت كە ئاژەڵەكە لە جۆری چەقەڵ-ە بە ئۆتۆمبێل بە سەختی برینداركراوە.
لە راگەیەندراوەكەدا هاتووە، مەفرەزەكە خواردن و ئاویان پێداوە و رێكخراوی پاكۆ لە سلێمانی بۆ پاراستنی ئاژەڵانی كوردستان ئاگاداركراونەتەوە تا ئەركی چارەسەر و پاراستنی لە ئەستۆبگرن.
