وەزیری دارایی هەرێم رایدەگەیەنێت، هەنگاوەكانی دروستكردنی بانكی نیشتمان وەك لقێكی بانكی ناوەندی لە هەرێمی كوردستان لە قۆناغی كۆتایدایە و بە كردنەوەی ئەو بانكە سیستمی بانكی لە هەرێمی كوردستان قۆناغێكی باش دەچێتە پێشەوە.
بەپێی راگەیەندراوێكی وەزارەتی دارایی و ئابوریی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ڕۆژی سێشەممە ئاوات جەناب نوری وەزیری دارایی و ئابوری لە دیوانی وەزارەت پێشوازیكرد لە شاندێكی بانكی نێودەوڵەتی لە ڕۆژهەڵاتی ناوەڕاست و باكووری ئەفریقا، بەسەرۆكایەتیی جۆن كریستۆڤەر كارێ بەڕێوەبەری هەرێمی ڕۆژهەلاتی ناوەڕاست و باكووری ئەفریقیای بانكی نێودەوڵەتی و شاندێكی هاوڕێی.
لەدیدارێكدا وەزیری دارایی خۆشحاڵی خۆی بەسەردانی شاندەكە دەربڕی و كورتەیەكی لەسەر كارو چالاكییەكانی وەزارەت لە بواری بەدیجیتاڵیكردنی سیستمی بانكەكان و دابەشكردنی مووچەی خانەنشینان و فەرمانبەران بەشێوەی ئەلیكترۆنی و رێكخستنەوەی سیستمی خەرجی بە شێوازی ئۆنلاین و زیادكردنی شەفافیەت و كەمكردنەوەی ڕۆتین پێشكەشكرد.
لای خۆشیانەوە شاندی میوان ستایشی هەنگاوەكانی وەزارەتی داراییان كرد لە بواری شەفافیەت و بەدیجیتاڵكردنی خزمەتگوزارییەكان و داوایانكرد پەیوەندی راستەوخۆیان هەبێت لەگەڵ وەزارەتی دارایی بە مەبەستی هەماهەنگی و هاوكاری لە بواری پێشكەشكردنی خزمەتگوزاری بانكی و دارایی و بەرزكردنەوەی توانای ستاف و كارمەندەكانی وەزارەت لە بوارە جیاجیاكاندا.
لەكۆتایی دیدارەكەدا وەزیری دارایی رایگەیاند هەنگاوەكانی دروستكردنی بانكی نیشتمان وەك لقێكی بانكی ناوەندی لە هەرێمی كورستان لە قۆناغی كۆتایدایە و بە كردنەوەی ئەو بانكە سیستمی بانكی لە هەرێمی كوردستان قۆناغێكی باش دەچێتە پێشەوە.
