ئەندامی لیژنەی نەوت و وزە لە ئەنجومەنی پارێزگای هەولێر رایدەگەیەنێت، نۆرەگرتن بۆ بەنزین لە هەولێر دەستیپێكردەوە و دەشڵێت، “نرخی بەنزینی نۆڕماڵ لە بەنزینخانەكاندا جیاوازە و تائێستا نازانرێت ئەو بەنزینەی بەشێوەی پاڵپشتیكراو بۆ شۆفێران دابیندەكرێت بڕەكەی كەمكراوەتەوە یاخودنا.
نافز ناوپردانی ئەندامی لیژنەی نەوت و وزە لە ئەنجومەنی پارێزگای هەولێر لە لێدوانێكدا بە تۆڕی میدیایی ئێستای راگەیاند، “ماوەی چەند رۆژێكە شۆفێران نۆرەیان بۆ ئەو بەنزینە گرتووە كە بەشێوەی پاڵپشتیكراو دابیندەكرێت و تا ئێستا هۆكارەكەی نازانرێت كە ئەو بڕە بەنزینەی پێشتر كەمكراوەتەوە یاخود نا و بۆ بەدواداچوون بۆ ئەو گرفتە دەكەین”.
راشیگەیاند، بەنزینی نۆرماڵ لە بەشێك لە بەنزینخانەكاندا نرخەكەیان جیاوازە و چەند بەنزینخانەیەك نرخی یەك لیتر بەنزینی نۆڕماڵ بە 1000 بۆ 1050 دینار دەفرۆشن و بەشێكی دیكەیان لەو نرخە كەمترە كە ئەوەش پەیوەندی بە كوالێتیی بەنزینەكەوە هەیە.
