بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە حەمید شەتری، سەرۆکی دەزگای ئاسایشی نیشتمانیی عێراق.
لە دیدارێکدا کە شاڵاو کۆسرەت رەسوڵ و جەلال شێخ ناجی، سەرۆکی ئاژانسی پاراستن و زانیاری/ زانیاری و ژمارەیەک لە لێپرسراوانی دەزگا ئەمنییەکان ئامادەیبوون، دۆخی ئەمنی و هەماهەنگییە سەربازی و هەواڵگرییەکانی نێوان دەزگا ئەمنییەکانی هەرێم و عێراق گفتوگۆیان لەبارەوەکرا.
لە دیدارەکەدا جەخت لە گەشەسەندن و پەرەپێدانی پەیوەندییە سەربازی، هەواڵگری و ئەمنییەکان کرایەوە وەک فاکتەرێکی سەرەکیی پاراستنی سەقامگیری و دوورخستنەوەی هەر مەترسییەک کە ژیان و ئارامیی هاوڵاتییان بخاتە مەترسییەوە.
سەرۆک بافڵ جەلال تاڵەبانی بە گرنگییەوە ئاماژەی بە کردە سەربازی و هەواڵگرییە هاوبەشەکانی نێوان دەزگاکانی هەرێم و بەغداد کرد و وتی، “هەماهەنگی و هاریکارییەکان لە ماوەی رابردوودا ئەنجامی ئەرێنی و دڵخۆشکەریان هەبووە، بۆیە دەبێت لە داهاتووشدا بە هەمان رۆحییەتەوە لە هەوڵەکانمان بۆ دوورخستنەوەی مەترسییەکان بەردەوامبین”.
