پەرلەمانتارانی یەکێتی: تەعریبکردن لە کەرکوک دەستیپێکردووەتەوە

ئەمڕۆ پەرلەمانتارانی خەڵکی شاری کەرکوک سەردانی ئەو شارەیانکرد تا لە نزیکەوە ئاگاداری ئەو ناکۆکی و ئاڵۆزییەبن لە هەندێک گوندی ناوچەکە دروستبووە، بەتایبەت گوندی پەڵکانە، پەرلەمانتارانی یەکێتیش پێیان وایە تەعریب دەستیپێکردووەتەوە.

لە کۆنگرەیەکی ڕۆژنامەوانیدا ئەمڕۆ 13 ی کانونی یەکەم پەرلەمانتارانی یەکێتی ڕایانگەیاند، “لە سنوری ناوچەی مادەی 140 ئەگەری دروستبوونی ئاڵۆزی هەیە لەنێوان پێکهاتەکان و عەرەبی ناوچەکە براونەتە کۆمەڵێک شوێن کە زەوی ئەوان نییە و خاوەنی ڕاستەقینەی ئەو شوێنانە کوردن”.

پەرلەمانتاران لە کۆنگرەیەکدا ڕایانگەیاند، “هەموو دەستێوەردانێکی سەربازی لە کەرکوک ڕەتدەکەینەوە و پێمان وایە دەبێت حکومەتی عێراقی و حکومەتی هەرێمیش ڕۆڵی سەرەکی ببینن لە چارەسەرکردنی ئاڵۆزییەکاندا، کە پێویستە لە ڕێگەی وەزارەتی کشتوکاڵ و وەزارەتی دادی عێراقییەوە چارەسەر بکرێت”.

ئەو پەرلەمانتارانە پێیان وایە حکومەتی عێراق، دەبێت لە ڕێگەی لیژنەیەکەوە کە نوێنەری وەزارەتە پەیوەندیدارەکانی تێدابێت کێشەی پێکاتەکان بەتایبەت کورد و عەرەب لەسەر زەوی و زارەکان چارەسەربکات، چونکە ئەوان پێیانوایە چارەسەری ئەو کێشەیە لای وەزارەتی داد و وەزارەتی کشتوکاڵە و ئەوان دەتوانن ڕێگەچارەیەک بدۆزنەوە.

لەماوەی زیاتر لە 15 ساڵی ڕابردوودا بەهۆی جێبەجێنەکردنی مادەی 140 لە دەستوری عێراقی، پێکهاتەکانی کەرکوک ناکۆکیان هەیە لەسەر زەوی و زارەکانی ناوچەکە و ئەو زەویانە پێشتر هی کوردەکانی ناوچەکە بووە و لەسەردەمی حزبی بەعسدا عەربی لەسەر نیشتەجێکراوە، دوای کاردانەوە سەربازییەکانی ڕیفراندۆمەکەی هەرێم ئەو ناوچانە جارێکی دیکە کەوتنەوە بەر مەترسی بە عەرەبکردن و ئێستاش وەک پەرلەمانتارانی یەکێتی دەڵێن، “تەعریب دەستیپێکردووەتەوە”.

بابەتی پێشتر

سبەی موچەی وەزارەتی خوێندنی باڵا دابەشدەكرێت

بابەتی دواتر

شاندی باڵای هەرێم لەگەڵ كۆمپانیای سۆمۆ كۆدەبێتەوە

بابەتی پەیوەندیدار
زیاتر ببینە

مەرقەدی عەبابەیلێ سوتێندرا

مەرقەدی گوندی عەبابەیلێ لەلایەن كەسانی نەناسراوەوە سوتێنرا و ئەنجومەنی گوندەكەش بە هەوڵی گێرەشێوێن و ترسنۆکانە ناویدەبات. لەلایەن كەسانی…