راوێژكاری سەرۆك وەزیرانی عێراق بۆ كاروباری دارایی دەڵێت، “بەرزبوونەوەی بەهای دۆلار كاتییە و چارەسەردەكرێت”.
موزهر محەمەد ساڵح راوێژكاری سەرۆك وەزیرانی عێراق بۆ كاروباری دارایی رایگەیاند، چەندین هۆكار لە پشت بەرزبوونەوەی بەهای دۆلارەوەن، لەوانە قۆرخكاری لە بازاڕدا كە لە دەرەوەی رێكارەكان و یاسا بووەتەهۆی بەرزبوونەوەی بەهای دۆلار.
راوێژكاری سەرۆك وەزیرانی عێراق دەشڵێت، “دەسەڵاتی دارایی مكوڕە لەسەر گەڕاندنەوەی هاوسەنگی بۆ بازاڕی دراو و بەهای دۆلار بەرامبەر بە دینار هاوسەنگدەكاتەوە”.
ئەمڕۆ دووشەممە بەهای 100 دۆلاری ئەمریكی لە بازاڕەكانی هەرێمی كوردستان و عێراق 157 هەزار دیناری تێپەڕاند و دواتر بۆ كەمتر لە 157 هەزار دینار دابەزی، ناجێگیرییەك لە نرخەكاندا سەریهەڵداوە كە ماوەی زیاتر لە سێ هەفتەیە بەردەوامە و تا ئێستا ئەو رێكارەكانی حكومەت باس لەوە دەكات كە بۆ بەرزكردنەوەی بەهای دینار دەیانگرێتەبەر، رەنگدانەوەیان لە بازاڕدا نەبووە.
