سەرۆكی یەكێتی سوپاسی هاوخەمی خەڵك، لایەنەكان و نێردەی وڵاتان و پەرۆشییان بۆ شەهیدبوونی شەهیدی فەرماندە ئاكام عومەر دەكات و دەڵێت، كوردستان رۆڵەیەكی دڵسۆز و بەئەمەكی لەدەستدا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە پەیامێكدا كە ئاراستەی خەڵك و هاوسەنگەرانی فەرماندە ئاكام، سەرۆكی پارت و لایەنە كوردستانی و عێراقییەكان، كەسایەتیییەكان، پارێزگار، پەرلەمانتار، دیپلۆماتكار و كونسوڵی وڵاتان، نوێنەری هێزەكانی هاوپەیمانان و هێزە چەكدارەكانی كردووە دەڵێت، سوپاسی پەرۆشی و هاوخەمیتان دەكەین بۆ شەهیدبوونی كاك ئاكام عومەر، فەرماندەی هێزەكانی كۆماندۆی كوردستان و بەشداریكردنتان لە رێوڕەسمی پێشوازی، بەخاكسپاردن و پرسەی فەرماندە ئاكام.
بافڵ جەلال تاڵەبانی راشیگەیاند، “بە شەهیدبوونی كاك ئاكام، كوردستان رۆڵەیەكی دڵسۆز و بەئەمەكی لەدەستدا، رۆڵەیەك كە خەمی نیشتمانی دابوو بە شانیدا و لەپێناو سەربەرزی و سەرفرازیی خەڵك و خاكەكەیدا خەباتی دەكرد”.
لە كۆتاییشدا دەڵێت، درود بۆ رۆحی برا و دۆستی دڵسۆز و تێكۆشەرم شەهید ئاكام و سەرجەم شەهیدانی رێگای رزگاریی كوردستان.
