ڕوسیا داوا لە کوردەکان دەکات شارێکی ڕۆژئاوا بدەنە دەست حکومەتی سوریا

ڕوسیا بە فەرمی داوای لە ئەنجومەنی سەربازی شاری عەین عیسا کردووە کە ئەو شارەیان ڕادەستبکەن و حکومەتی سوریا کۆنترۆڵی بکات، تا ببێتە ڕێگری بۆ ئەگەری پێشڕەوی چەکدارەکانی نزیک لە تورکیا و سوپای تورکیا بۆناو خاکی ڕۆژئاوای کوردستان.

بەپێی هەواڵی ئاژانسە ئێرانییەکان لە سەرچاوەیەکەوە لە سوریا ئاشکرایکردووە، “حکومەتی سوریا و هەسەدە بە نێوەندگیری ڕوسیا کۆبوونەتەوە و تاوتووێی ئەوە کراوە کە شاری عەین عیسا ڕادەستی حکومەتی سوریا بکرێتەوە، بۆ ئەوەی ببێتە ڕێگر لە پێشرەوی سوپای تورکیا و بتوانرێت ئاڵای حکومەتی سوریا لەسەر فەرمانگەکان هەڵبکرێت”.

پلانەکەی ڕوسیا بۆ ئەوەیە کاتێک شارەکە درایە دەستی حکومەتی سوریا بتوانێت سیستمی بەرگری موشەکی تێدا جێگیر بکات و هەر هێرشێک بۆ شارەکە ببێتە هێرش بۆسەر حکومەتی سوریا و ڕوسیا بتوانێت لەسەری بێتە دەنگ.

هاوکات بەرپرسێکی ئەنجومەنی سەربازی عەین عیسا هەوالەکەی پشتڕاستکردووەتەوە و ڕایگەیاندووە، ” لەو کۆبوونەوەیەدا ڕوسیا پێشنیازی کردووە عەین عیسا ئەگەر کۆنترۆڵی تەواویش نەبێت هەندێک ناوچەی بدرێتە دەست حکومەتی سوریا، تا تورکیا و چەکدارەکان سڵبکەنەوە لە هێرشکردنە سەر شارەکە”.

عەین عیسا دەکەوێتە نێوان کۆبانێ و شاری ڕەقەوە و زۆرینەی دانیشتوانەکەی عەرەبن، بەڵام لە چوارچێوەی بەڕێوبەرایەتی خۆسەری دیموکراتیکدایە لە ڕۆژئاوای کوردستان، بەهۆی زۆری ڕیژەی عەرەبنشینەوە حکومەتی سوریا دەیەوێت شارەکە بخاتە ژێر کۆنترۆڵی خۆیەوە و لە ڕۆژهەڵاتی ڕوباری فورات نزیک بێتەوە.

بابەتی پێشتر

حەسەن كەعبی بەیاننامەیەك لەسەر كێشەكانی هەرێم بڵاودەكاتەوە

بابەتی دواتر

حکومەتی عێراق: سورین لەسەر ئەوەی دۆسیەی ئاوارەکان بەتەواوی دابخەین

بابەتی پەیوەندیدار