بەڕێوەبەری كۆمپانیای خۆراك لە سلێمانی رایدەگەیەنێت، بۆ ئەمساڵ هیچ بەشەخۆراكێكی مانگانەی هاوڵاتییان نافەوتێت و ئاشكرایدەكات هەر ماددەیەكی دیكە بۆ بەشەخۆراكی هاوڵاتییان زیادبكرێت لە ساڵی نوێوە كاری پێدەكرێت.
شەوكەت محەمەد بەڕێوەبەری كۆمپانیای خۆراك لە سلێمانی لە لێدوانێكدا بە تۆڕی میدیایی ئێستای راگەیاند، ئەمساڵ هەموو مانگێك لەكاتی خۆیدا بەشەخۆراكی پێویستمان لەلایەن حكومەتی عێراقەوە بۆ نێردراوە بۆیە تا وەكو كۆتایی ئەمساڵ هیچ بەشە خۆراكێكی هاوڵاتییان نافەوتێت.
ئاماژەی بۆ ئەوەش كرد، بۆ زیادكردنی چەند ماددەیەك بۆ بەشەخۆراكی مانگانەی هاوڵاتییان دەبێت بە نووسراوی فەرمی بە ئێمە بگات و تا وەكو ئێَستا هیچ نووسراوێكمان ئاراستە نەكراوە و ئەوەی باسی لێوەدەكرێت هەموو ئەندامێكی خێزان یەك كیلۆ شەكری بۆ زیاددەكرێت لەگەڵ زیادكردنی پاقلە،تایت و سابوون، بەڵام بڕیاری زیادكردنی هەر ماددەیەك بدرێت دەبێت بە نووسراو لە بەغداوە ئاگاداربكرێینەوە.
