باڵیۆزی دانیمارك لە عێراق سەردانی بەڕێوەبەرایەتیی گشتی دژەتیرۆر دەكات و پاڵپشتیی وڵاتەكە بۆ هێزەكانی پێشمەرگە و دژەتیرۆر دووپاتدەكاتەوە.
ئەمڕۆ کرستیان تۆرنینگ، باڵیۆزی دانیمارک لە عێراق و کۆڵۆنێڵ گێرت، پاشکۆی سەربازیی لە باڵیۆزخانەی دانیمارک سەردانی بەڕێوەبەرایەتیی گشتی دژەتیرۆری كرد و لەلایەن وەهاب هەڵەبجەیی، بەڕێوەبەری گشتیی دژەتیرۆر پێشوازیكران.
لە كۆبوونەوەكەدا سەرەڕای گفتوگۆکردن لەبارەی پێشھاتە ئەمنی و سەربازییەکان، هەردوولا جەختیانکردەوە لەسەر رەخساندنی زەمینەیەکی گونجاوتر بۆ باشترکردنی پەیوەندی و هەماهەنگییەکانی نێوان هێزەکانی دژەتیرۆر و هێزەکانی دانیمارک لەڕووی سەربازی و بەردەوامی کردە سەربازییەکان بۆ ریشەکێشکردنی تیرۆر.
کرستیان تۆرنینگ، باڵیۆزی دانیمارک تەئکیدیکردەوە لە بەردەوامی رۆڵی وڵاتەکەی وەک ئەندامێکی ناتۆ لە عێراق لە پشتگیریکردنی پێشمەرگە، هێزەکانی دژەتیرۆر و ھێزەکانی عێراق بۆ رووبەڕوبوونەوەی تیرۆر و کارکردن لەپێناو سەقامگیری زیاتر.
تەوەرێکی دیکەی کۆبونەوەکە پەیوەستکرا بە باسکردن لە بارودۆخی هەرێمی کوردستان و ناوچەکە و مەترسییە دەرەکی و هەرێمییەکانی سەر هەرێمی کوردستان.
