تەرمێكی دیكەی كۆچبەرە قوربانییەكانی بەلەمەكەی یۆنان دۆزرایەوە و دەزگای لوتكەش دەڵێت، هێشتا 27 كۆچبەر بێسەروشوێنن.
دەزگای لوتكە بۆ كاروباری ئاوارە و پەنابەران رایگەیاند، ژمارەی قوربانییانی رووداوی ژێرئاوكەوتنی بەلەمەكەی 1ی ئەم مانگەی یۆنان بۆ 29 كەس بەرزبووەوە.
رێكخراوەكە لە زاری حسێن حەمەساڵح-ی نوێنەریەوە ئاشكرایكرد، بەیانی ئەمڕۆ تەرمی یەكێكی دیكە لە قوربانییان دۆزرایەوە كە تەرمی پیاوێكە و لە كەناراوەكانی ئێڤیا دۆزراوەتەوە، بەڵام ناسنامەی دیارنییە.
لەو رووداوەی بەلەمەكەدا تائێستا 12 كۆچبەر رزگاركراون، 27 كۆچبەریش بێسەروشوێنن، وەك ئەوەی دەزگای لوتكە ئاماژەی پێداوە.
بەرەبەیانی رۆژی سێشەممە 1ی تشرینی دووەم یەختێك بە 70 كۆچبەرەوە لە نزیك دوورگەی ئیڤیای یۆنان ژێرئاوکەوت. بەشێك لە قوربانییەكانی هاوڵاتی كورد بوون.
