تیمی “سیکیۆریتی” هەڵبژاردەی پۆڵەندا یەکێک لە یاوەرەکانی ڕۆبێرت لیڤاندۆڤسکیی هێرشبەری یانەی بەرشلۆنەیان دەرکردوو، کە وەک پاسەوان لەگەڵیدا بووە.
ڕۆژنامەی مۆندۆ دیپۆرتیڤۆی ئیسپانی بڵاویکردووەتەوە، دوای کۆبوونەوەی یاریزانان و ستافی هەڵبژاردەی پۆڵەندا، بەر لە گەستکردنیان بۆ قەتەر لەلایەن تیمی “سیکیۆریتی”یەوە یەکێک لە یاوەرەکانی لیڤاندۆڤسکی دەرکراوە، بەتایبەت دوای ئەوەی دەرکەوتووە ئەو کەسە سەر بە گرووپی نازییە نوێیەکانە و ئەندامی باندێکی تاوانکارە.
پۆڵەندا زۆر بە توندی مامەڵە لەگەڵ ئایدۆلۆژیای نازی دەکات، بەوپێیەی ئەڵمانیای نازی لە جەنگی جیهانی دووەمدا وڵاتەکەیانی داگیرکردووە و وێرانکاری و کوشتنی زۆری بەرامبەر گەلی پۆڵەندی کردووە.
هەڵبژاردەی پۆڵەندا خۆی بۆ مۆندیالی قەتەری 2022 ئامادە دەکات، لەگەڵ هەڵبژاردەکانی ئەرجەنتین و سعودیە و مەکسیک کەوتووەتە یەک کۆمەڵەوە.
