بەڕێوەبەرایەتیی کشتوکاڵی سلێمانی پێشتر ئاشکرایکرد، دەرچووانی کشتوکاڵ پوورەی هەنگیان پێدەدرێت بەمەبەستی پاڵپشتیکردنیان تاوەکو ببنەخاوەن کاری خۆیان، بەڕێوەبەری کشتوکاڵی سلێمانیش دەڵێت، ژمارەی پوورە هەنگەکان و ئەوانەشی پێیاندەدرێت دیاریکراون.
شاڵاو جەمال بەڕێوەبەری کشتوکاڵی سلێمانی بە تۆڕی میدیایی ئێستای راگەیاند، “پڕۆژەکە ڕێکخراوی گیزی ئەڵمانی ئەنجامی دەدات و دەرچووانی ناوچەکانی ماوەت، پێنجوێن، شارباژێڕ و بازیان دەگرێتەوە”.
بەپێی بەڕێوەبەری کشتوکاڵی سلێمانی، پڕۆژەکە دەرچووانی کشتوکاڵ (زانکۆ، پەیمانگا و ئامادەیی) دەگرێتەوە بەمەرجێک دانەمەزراو بێت و شارەزایی هەبێت لە بەخێوکردنی هەنگدا.
ئاماژەی بەوەکردووە، هەر دەرچوویەک چوار پوورەی هەنگی پێدەدرێت بە سەرجەم پێداویستییەکانەوە، هەروەها خوولی تایبەت بە ڕاهێنان و چۆنێتیی پەروەردەکردنی هەنگ دەکرێتەوە بۆ ئەو کەسانە.
وتیشی، ئەوانەی پوورە هەنگەکانیان پێدەدرێت چاودێریی تەندروستی و پێداویستیی پارێزگاریکردن لە هەنگەکانیان پێدەدرێت بۆ ماوەی شەش مانگ.
سەبارەت بە داهاتی ئەو پوورە هەنگانە بەڕێوەبەری کشتوکاڵی سلێمانی ڕایگەیاند، پوورە هەنگەکان بەبێ بەرامبەر دەدرێت بە دەرچووەکان و داهاتەکەشی لە سەدا سەدی بۆ خۆیانە و داوای هیچییان لێناکرێت لە بەرامبەردا.
باسی لەوەشکرد، ژمارەی ئەو کەسانەی ڕێکخراوی گیز دیاریکردوون پوورەی هەنگیان پێبدات 70 دەرچووی کشتوکاڵە لەو چوار ناوچەیەیە و ژمارەی پوورە هەنگەکانیش 280 کەسن.
