سەرۆكایەتیی شارەوانیی سلێمانی ڕایدەگەیەنێت، لە سەرەتای مانگی ئایاری ئەمساڵەوە هەڵمەتێكی قیرتاوكردن و نۆژەنكردنەوەی كۆڵان و شەقامەكان دەستپێكراوە و هەفتەی داهاتووش هەڵمەتەكە لە چەند گەڕەكێك بەردەوامدەبێت.
بەپێی ڕاگەیەندراوێكی سەرۆكایەتیی شارەوانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە سەرەتای مانگی ئایاری ئەمساڵەوە هەڵمەتێكی قیرتاوكردن و چاككردنی شەقامەكان ئەنجامداوە و ڕۆژانە تیمەكانی قیرتاوكردن كە پێكدێن، لە بەشی پڕۆژەكانی شارەوانی و بەشی ئامێرەكانی شارەوانی و كارگەی قیری شارەوانی لە تانجەرۆ لەلایەن ئەندازیاران، كرێكاران، شۆفێران و سەرجەم كارمەندە دڵسۆزەكان لە ئەركەكانیان بەردەوامن.
لە ڕاگەیەندراوەكەدا هاتووە، هەڵمەتەكان بەردەوامدەبن و ئەم هەفتەیە كار لە تەواوكردن و قیرتاوكردنی شەقامی بەردەم وێستگەی كارەبای تاڤگە، قیرتاوكردنی شەقامی بەردەم پڕۆژەی ئاوی سەرچنار، قیرتاوكردنی شەقام و كۆلانەكانی گەڕەكی بەكرەجۆ كە نزیكەی 8000 مەتر دەبێت.
ئاماژە بۆ ئەوەش كراوە، چاككردن و نۆژەنكردنەوەی شەقامی بەختیاری، چاككردنی شەقام و كۆڵانەكانی پشت مزگەوتی گەورەی سلێمانی و پڕكردنەوەی چاڵ و چۆڵی شەقامەكانی ناو بازاڕی ڕاپەرینیش ئەنجامدەدرێت.
