ڕێکخراوی تەندروستیی جیهانی بڵاویکردەوە، ڕێژەی تووشبوون بە نەخۆشیی سیل لەسەر ئاستی جیهان بەشێوەیەکی بەرچاو بەرزبووەتەوە، وڵاتان و شوێنە هەژارەکانیش زۆرترین تووشبوویان هەیە.
ڕێکخراوەکە ڕایگەیاندووە، لە کۆتایی ساڵی 2021دا ژمارەی تووشبووانی سیل گەیشتە 10.6 ملیۆن ئاستی بەرزبوونەوەی تووشبوونیش بەراورد بە ساڵی 2020 %4.9 بووە.
ئاماژە بەوەشکراوە، ئێستا جیهان ڕووبەڕووی دۆخێکی توندی نەخۆشییەکە دەبێتەوە، بەهۆی ئەوەی لەڕێگەی هەواوە دەگوازرێتەوە، هەروەها نەخۆشییەکە پشگوێخراوە و بە نابەرپرسیارییەوە مامەڵەی لەگەڵ دەکرێت.
هۆکارێکی بەرزبوونەوەی ڕێژەی تووشبوون بەو نەخۆشییە بۆ ئەوە دەگەڕێنرێتەوە کە لە ماوەی ساڵانی 2020 بۆ 2021دا بەهۆی کۆرۆناوە ڕێکارەکانی کوتان و ڕێگری لە بڵاوبوونەوەی سیل پشتگوێخراون.
