عەلی حەمەساڵح ئەندامی پەرلەمانی کوردستان لەبارەی دۆخی دکتۆر کازم فاروقەوە ڕایگەیاند، ناتوانین پەیوەندیی پێوەبکەین، لە دەرەوەی هەرێمە، خێزانەکەشی نایانەوێت قسەی لەبارەوە بکەن و ناشزانین هۆکارەکەی چییە.
لە کۆنگرەیەکی ڕۆژنامەوانیدا عەلی حەمە ساڵح ڕایگەیاند، “دکتۆر کازم فاروق ئێستا لە دەرەوەی وڵاتە و لە نەخۆشخانەکانی هەرێم نییە تا بتوانین ئەنجامەکانی وەرگرین و دۆخی بزانین، ئەمە جگە لەوەی من چەند جارێک پەیوەندیم پێوەکردووە و وەڵامی نەداومەتەوە”.
باسی لەوەشکرد، کێشەیەکی دیکە ئەوەیە کە خێزان و کەسوکاری دکتۆر کازم نایانەوێت قسە لەسەر دۆخی تەندروستیی بکەن، نازانین هۆکاری قسە نەکردنیان چییە.
وتیشی، دۆسیەی نەخۆشکەوتن و بێهەواڵیی دکتۆر کازم فاروق دۆسیەیەکی ئاڵۆزە و دەبێت لێکۆڵینەوەی لێبکرێت، “ئێمە داوامان لە سەرۆکایەتیی پەرلەمانیش کردووە بۆئەوەی لێکۆڵینەوە لە دۆسیەکە بکات”.
ئەمە لەکاتێکدایە پێشتر دەنگۆی مردنی دکتۆر کازم فاروق بڵاوبووەوە و شەوی ڕابردووش کەسوکارەکەی ڕایانگەیاند، دکتۆر کازم نەمردووە و لە نەخۆشخانەیەکی دەرەوەی وڵات چارەسەر وەردەگرێت.
