بافڵ جەلال تاڵەبانی سەرۆكی یەكێتیی نیشتمانیی كوردستان، پەیامێكی هاوخەمیی بۆ شەهیدبوونی ئەفسەرێكی هێزەكانی كۆماندۆ و برینداربوونی فەرماندەی هێزەكە و چەند كارمەندێكی دیكەی كۆماندۆ لە لایەن رەیان كلدانی سكرتێری گشتیی بزوتنەوەی بابلییونەوە پێگەیشت.
لە پەیامەكەیدا رەیان كلدانی، هاوخەمیی خۆی بۆ شەهیدبوونی مولازم زوهێر محەمەد دەربڕیوە و پرسە و سەرەخۆشی ئاراستەی خانەوادەكەی و سەرۆكی یەكێتیی نیشتمانیی كوردستان دەكات و دەڵێت، “لە خودا دەپاڕێینەوە ئاكام عومەر فەرماندەی هێزەكانی كۆماندۆی كوردستان و هاوسەنگەرەكانی كە لە هێرشێكی تیرۆریستیدا لە كاتی راپەڕاندنی ئەركی فەرمیی خۆیاندا برینداربوون، زوو چاكببنەوە”.
لە كۆتایی پەیامەكەیدا، سكرتێری گشتیی بزوتنەوەی بابلییون داواكارە هەوڵەكان یەكبخرێن و چڕبكرێنەوە و هەماهەنگیی زیاتر هەبێت بۆ بەرەنگاربوونەوەی تیرۆر و بەرقەراركردنی ئاسایش و ئارامی لە وڵاتدا.
