نوری مالكی سەرۆكی هاوپەیمانیی دەوڵەتی یاسا دەڵێت، “پشتیوانیی حكومەتی نوێ دەكەین، بەڵام لێپێچینەوەشی لەگەڵدا دەكەین”.
“دەمانەوێت حكومەتی نوێ خزمەتگوزاربێت و شكۆی دەوڵەتمان بۆ بگەڕێنێتەوە، كارەبا و شوێنی نیشتەجێبوون و هەلی كار و خزمەتگوزاری دەستەبەربكات”، ئەمە دوایین لێدوانی نوری مالكی سەرۆكی پارتی دەعوە و هاوپەیمانیی دەوڵەتی یاسایە لەبارەی ئامادەكارییەكانیان بۆ پێكهێنانی حكومەتی نوێ لە عێراق.
مالكی كە ئەمڕۆ شەممە لە ساڵیادی دامەزراندنی پارتی دەعوەدا وەك سەرۆكی پارتەكە قسەیكرد، جەختیكردەوە لەوەی “حكومەتی داهاتوو بەخشش نابێت بدرێت، بەڵكو كۆت و بەرپرسیارێتی دەبێت لە گەردنی ئەوانەی شانی دەدەنەبەر”.
ڕاشیگەیاند، “زۆربەی قەیران و گرفتەكان چارەسەردەكرێن بە تایبەت كشتوكاڵ و ئاو، پشتیوانیی حكومەت دەكەین و دەستبەرداری نابین، بەڵام لە هەمان كاتدا لێپێچینەوەشی لەگەڵدا دەكەین”.
