بافڵ جەلال تاڵەبانی بۆ ساڵیادی كۆچی مام جەلال: یەكێتیمان بەرەو ڕێگە ڕاستەقینەكە ئاڕاستەكرد

سەرۆكی یەكێتی لە پەیامێكدا بەبۆنەی پێنجەمین ساڵیادی كۆچی دوایی سەرۆك مام جەلال ڕایدەگەیەنێت، بڕیارە دروست و مێژووییەكەمان دا و یەكێتیمان بەرەو ڕێگە ڕاستەقینەكە ئاڕاستەكرد و دەشڵێت، “بە ویژدانێكی ئارامەوە بۆت دەنووسم هەر ئەوەمان ئەنجامدا كە لێمان چاوەڕێدەكرا”.

بافڵ جەلال تاڵەبانی، سەرۆكی یەكێتیی نیشتمانیی كوردستان لە پەیامەكەیدا ڕایگەیاند، باوکی ئازیزم، پێنج ساڵی تەواوە لێرەنیت و دەمەوێت بە ئەوپەڕی ڕاستگۆیی، دڵێکی پڕ لە هیوا و ویژدانێکی ئاسوودەوە لەبارەی گۆڕانكارییەكانی ئەمدواییەی یەكێتی، كوردستان و عێراقەوە بۆت بنووسم.

بافڵ جەلال تاڵەبانی وتیشی، “دەمەوێت بگەڕێمەوە بۆ شەست ساڵ لەمەوبەر، ئەوکاتەی بە ورەیەکی پۆڵایین و هێزێکی لەبن نەهاتووەوە وەک رێبوارێکی رێگای ئازادی و شکۆمەندی، خەمی کورد و کوردستانت کردە کۆڵ و ژیانت کردە قوربانیی ئەو ئامانج و بەها پیرۆزانەی هەرگیز سازشت لێنەکرد. ئامانجێک کە خۆی لە بەدیهێنانی مافە رەواکانی گەلی کورد، دادپەروەری، دیموکراسی، تەبایی و پێکەوەژیاندا دەبینییەوە. دامەزراندنی یەكێتیی نیشتمانیی کوردستانیش لەگەڵ هاوخەبات و هاوڕێکانتدا هەر لەو پێناوەدا بوو”.

“لای هەمووان روون و ئاشکرایە پاراستنی یەکێتی ناو یەکێتی و دەستگرتن بە سیاسەتی چەپکەگوڵەکەوە خەمی گەورەی تۆ بوو. دەتویست یەکێتیی نیشتمانیی کوردستان سەنگەرێک بێت بۆ بەرگری لە خاکی کوردستان و دۆزە رەواکانی گەلی کورد. وێستگەیەک بێت بۆ کۆکردنەوەی جیاوازییەکان و بونیادنانی کۆمەڵگەیەکی دیموکراسی و تەندروست” وەك ئەوەی لە بەشێكی دیكەی پەیامەكەی سەرۆكی یەكێتی-دا هاتووە و ئەوەشی خستەڕوو، “بەڵام بەداخەوە لەم دواییەدا كەسانێك ڕێگەكەیان ونكرد و چەپكەگوڵەكەیان بەرەو وشكبوون دەبرد. ئاراممان گرت و پشوومان درێژ، بەڵام لەكۆتاییدا بڕیارە دروست و مێژووییەكەمان دا و یەكێتیمان بەرەو ڕێگە راستەقینەكە ئاڕاستەكرد. بەڵێنمان بە ڕۆحی تۆ و خەڵکە دڵسۆزەکەماندا یەکێتییەکەت وەک چاومان بپارێزین. ژیانی حزبایەتیمان خستەوە سەر ڕێچکە تەندروستەکە و هەموو ئۆرگانەکانمان کردووەتە ناوەندێک بۆ خزمەتکردنی خەڵکی کوردستان. ئەمەش هەر ئەوەبوو کە تۆ دەتویست”.

بافڵ جەلال تاڵەبانی دووپاتیكردەوە، دەمانەوێت لەگەڵ خوا و خەڵكەكەمان ڕاستگۆبین. لە ئاست ئەو بەرپرسیارێتییە نەتەوەیی و نیشتمانییەدا بین كە وەرمانگرتووە. یەكێتی هەڵگری سیاسەتێكی حەكیمانە و تەندروست بێت وەك ئەوەی خۆت پەیڕەوت دەكرد. بەدیدگایەكی نیشتمانییەوە كار بۆ بەرژەوەندییە گشتی و باڵاكان بكەین و خزمەتی خاك و خەڵكە خۆشەویستەكەمان بكەین. هەوڵ بۆ بەدیهێنانی دادپەروەری بدەین و پەرە بە گیانی تەبایی و پێكەوەژیان بدەین. ڕێز لە جیاوازییەكان بگرین و دەرگامان بەڕووی ڕەخنە و گلەییەكاندا كراوە بێت. دەمانەوێت ژینگەیەك فەراهەم بكەین كە تاكەكان هەست بە ئارامی و پارێزراوی بكەن. دەزانین رێگەكەمان سەختە و بەربەستەكان زۆرن، بەڵام بەڵێنێكە و داومانە (نەسرەوتن تا سەركەوتن).

ئاماژەشیدا، ساڵی ڕابردوو و لە چوارەمین ساڵیادی كۆچتدا بۆم نووسیت هەر بڕیارێك داومانە و دەیدەین لەپێناو چاكەی گشتیدا بووە و دەبێت. ئێستاش دوای ساڵێك بە ویژدانێكی ئارامەوە بۆت دەنووسم هەر ئەوەمان ئەنجامدا كە لێمان چاوەڕێدەكرا. ڕێگریمان لە بەهەدەردانی سامانی گشتی كردووە و ڕووبەڕووی نایەكسانی و نادادی وەستاوینەتەوە. بەكارهێنانی پلە و پۆستمان بۆ بەرژەوەندیی تایبەت و دەستبردن بۆ مافی گشتی قەدەغە كردووە. یاساشكێنانمان داوەتە دادگا و ئارامی و ئاسایشمان لە پێشینەی ئەركەكانمان داناوە. لە بوارەكانی تەندروستی، پەروەردە و ژینگە خزمەتی زۆرمان پێشكەشكردووە و بەردەوامیش دەبین.

سەرۆكی یەكێتی ڕوونیشیكردەوە، لە ماوەی ڕابردوودا عێراق، ئەو وڵاتەی تۆ سەرۆككۆماری بوویت، بەدۆخێكی هەستیار و تەنگژەیەكی قووڵی سیاسیدا تێپەڕی. ڕوانینێكی سادە بۆ دۆخەكە ئەو ڕاستییەی دەردەخست كە كۆچی تۆ چ بۆشاییەكی لە گۆڕەپانی سیاسیدا دروستكردووە، بەڵام نائومێد نەبووین، بەسوودوەرگرتن لە ئەزموون و گەنجینەی پڕ گەوهەری تۆ لە هەوڵەكانمان بۆ تێپەڕاندنی دۆخەكە و كۆكردنەوەی لایەنەكان لەپێناو هاوبەشیی ڕاستەقینە و سازان بەردەوام بووین. یەكێتیی نیشتمانیی كوردستان سیاسەتی حەكیمانەی تۆی پەیڕەوكرد و هەمووان شاهیدی ئەو ڕاستییەمان بۆ دەدەن كە بەشێك بووین لە چارەسەر نەوەك ئاڵۆزی. بۆ ئەمەش خۆمان بە قەرزار و سوپاسگوزارت دەزانین.

بافڵ جەلال تاڵەبانی لە كۆتایشیدا دەڵێت، “یادت بەخێر شكۆی نەتەوە و نیشتمان، مێژوو بە شانازییەوە ناوت دەهێنێت”.

بابەتی پێشتر

نووسەری "كۆتایی مێژوو" پێشبینی داڕمانی ڕوسیا لە ڕۆژانی داهاتوودا دەكات

بابەتی دواتر

زیقار.. بەهۆی خۆپیشاندانەکانەوە قەدەغەی هاتوچۆ ڕاگەیەندرا

بابەتی پەیوەندیدار
زیاتر ببینە

خشتەی موچە بڵاوكرایەوە

وەزارەتی دارایی هەرێم خشتەی موچەی بڵاوكردەوە، بەگوێرەی ئەو خشتەیە لەماوەی شەش ڕۆژدا سەرجەم موچەخۆان موچەكانیان وەردەگرن. ئەوەش لەكاتێكدایە،…
Total
11
Share