دوای تێپەڕبوونی زیاتر لە دوو مانگ بەسەر تیرۆرکردنیدا، پرسەی فەرمی شینزۆ ئابی سەرۆک وەزیرانی پێشووی ژاپۆن لە ڕێوشوێنێکی ئەمنی توندا ئەنجامدەدرێت.
بەیانی ئەمڕۆ سێشەممە، لە بنکەی نیبۆن بۆدۆکان لە ناوەڕاستی تۆکیۆی پایتەخت ڕێوڕەسمی فەرمی پرسەی شینزۆ ئابی سەرۆک وەزیرانی پێشووی ژاپۆن بە بەشداری ژمارەیەکی زۆر لە نوێنەرانی وڵاتانی جیهان دەستیپێکرد.
شینزۆ ئابی، لە 8 ی تەممووزی ئەمساڵ، لەمیانەی بەشداریكردن لە هەڵمەتی بانگەشەی هەڵبژاردنی وڵاتەكەی تەقەی لێكرا و بەهۆی سەختی برینەكەیەوە گیانی لەدەستدا، دوای تێپەڕبوونی سێ رۆژیش تەرمەکەی لە پەرستگای زۆژۆجی شاری تۆكیۆ و بەخاك سپێردرا.
لەسەر بڕیاری حکومەتی وڵاتەکەی بڕی دوو ملیۆن دۆلار، بۆ ئامادەکارییەکانی ڕێوڕەسمی پرسەکە و خەرجییە ئەمنییەکانی تەرخانکراوە، ئەمەش ناڕەزایەتی لەلای بەشێک لە هاووڵاتیانی ووڵاتەکەی لێکەوتووەتەوە.
