پۆلیسی سلێمانی ڕایدەگەیەنێت، کەسێکیان بە تۆمەتی تەقەکردن لە نزیک پردی خەسرەوخاڵ و بریندارکردنی کەسێک دەستگیرکردووە.
بەڕێوەبەرایەتیی پۆلیسی پارێزگای سلێمانی ڕایگەیاند، دوای ئەوەی شەوی ڕابردوو ڕووداوێكی تەقەكردن لە نزیك پردی خەسرەوخاڵ لە سلێمانی ڕوویدا، دەستبەجێ مەفرەزەكانی پۆلیس گەیشتنە شوێنی ڕووداوەكە و دەركەوت تۆمەتبارێك هاوڵاتییەكی بەفیشەك برینداركردووە و هەڵاتووە.
ئاماژەی بەوەشکرد، “توانرا لەماوەیەكی كەمدا و هەمان شەو تۆمەتبار بدۆزرێتەوە و دەستگیربكرێت، لەكاتی دەستگیركردنیشیدا دەستگیرا بەسەر چەكێكی جۆری دەمانچە كە تۆمەتبار تەقەی پێكردبوو لەگەڵ ئۆتۆمبێلێكدا كە بە تۆمەتبار بووە”.
شەوی پێنجشەممەش لەلایەن هێزە ئەمنییەكانەوە دوو كەسی شۆفێری تەكسی و ماتۆڕسكیل دەستگیركران كە لە نزیك شەقامی سالم تەقەیان كردبوو.
لەئێستادا تۆمەتبار (ب.م.م. لەدایكبووی 1975) بە بڕیاری دادوەر ڕاگیراوە و لێكۆڵینەوەكان بەردەوامن، وەك ئەوەی پۆلیسی سلێمانی دەیڵێت.
