لەدوای تێکچوونی دۆخی تەندروستی لە هەفتەی ڕابردووەوە، عەلی خامنەیی رابەری شۆڕشی ئیسلامی لە ئێران، سەرجەم چالاکی و کۆبوونەوەکانی ئەم هەفتەیەی راگرتووە.
ڕۆژنامەی نیویۆرک تایمز، بڵاویکردەوە، “عەلی خامنەیی رابەری شۆڕشی ئیسلامی لە ئێران، هەفتەی رابردوو، دووچاری ئازارێکی بەهێزی گەدە و بەرزبوونەوەی پلەی گەرمای لەشی بووەتەوە، دوای ئەنجامدانی پشکنینی پزیشکی دەرکەوتووە دوچاری (گیرانی ڕیخۆڵە) بووەتەوە هەر بۆیە بە پەلە نەشتەرگەری بۆ کراوە”.
بەوتەی ڕۆژنامەکە، “تائێستا خامنەیی لەناو جێگەدا ماوەتەوە و لەژێر چاودێریی پزیشکیدایە، سەرجەم ئەو چالاکی و کۆبوونەوانەی بڕیاربوو لەم هەفتەیەدا ئەنجامیان بدات هەڵوەشاونەتەوە”.
عەلی خامنەیی تەمەن 83 ساڵ، لەساڵی 2014، جارێکی دیکە دۆخی تەندروستی تێکچوو، لەوکاتەدا حکومەتی ئەو وڵاتە بڵاویکردەوە کە نەشتەرگەری “پرۆستات”ی بۆ کراوە و دۆخی تەندروستی جێگیرە.
ڕۆژنامەی نیویۆرک تایمز، ئاشکرایکرد، هەفتەی رابردوو دۆخی خامنەیی زۆر خراپ بووە، بەڵام لەم هەفتەیەدا ئەو مەترسیانەی تێپەڕاندووە، بەڵام پزیشکەکان ڕێنماییان کردوە، لەناو جێگەدا بمێنێتەوە و پشووبدات.
تائێستا حکومەتی ئێران بە فەرمی هیچ زانیارییەکی لەبارەی دۆخی تەندروستیی ڕابەرەوە ئاشکرانەکردووە.
