ماوەی دوو ڕۆژە گەلەگورگ پەلاماری دانیشتووانی گوندێكی عێراق دەدەن و 10 كەس برینداربوون.
شەوی پێنجشەممە و بەرەبەیانی ئەمڕۆ هەینی، گەلەگورگ هێرشیانكردووەتەسەر دانیشتووانی گوندی ئەلبوجمعەی باكووری شاری ناسڕییە، جگە لە ئاژەڵ پەلاماری دانیشتووانی گوندەكەشیان داوە.
پۆلیسی پارێزگای زیقار دەڵێت، هەردوو هێرشەكەی گورگەكان بۆ سەر هەمان گوند بوون و هەردوو جارەكە دانیشتووانی گوندەكەیان برینداركردووە.
بەپێی وتەی پۆلیس، 10 كەس بەهۆی پەلاماری گورگەكانەوە برینداربوون و ڕەوانەی نەخۆشخانە كراون و بەشێكیان برینەكانیان سەختن.
ماوەیەك لەمەوبەر و لە گوندێكی هەمان ناوچە، پیاوێكی بەساڵاچوو دوای دوو ڕۆژ لە بێسەروشوێنبوونی، دەركەوت گورك خواردوویەتی و بەشێك لە تەرمەكەی لە دەشتاییەكانی پارێزگای زیقاردا دۆزرایەوە.
