بەڕێوەبەری چاودێری و بازرگانیی سلێمانی ڕایدەگەیەنێت، نرخی ماسی هەرزان بووە، جەختیشدەكاتەوە ئەو ماسییانەی لە دەرەوە هاوردەدەكرێن هیچ مەترسییەكیان لەڕووی تەندروستییەوە نییە و پشكنینیان بۆ دەكرێت.
سۆران عەبدولغەفور، بەڕێوەبەری چاودێری و بازرگانیی سلێمانی لە لێدوانێكدا بە تۆڕی میدیایی ئێستای ڕاگەیاند، پێشتر نرخی یەك كیلۆ ماسی گەیشتە 11هەزار دینار و ئێستا بەهۆی هەڵگرتنی قەدەغەی ڕاوە ماسی و بڕێكی زۆر لە دەرەوە هاوردە دەكرێت و بەرهەمی ناوخۆش زۆرە و هەموو ئەوانەش كاریگەری لەسەر هەرزانبوونی نرخەكەی هەبووە و یەك كیلۆ ماسی بە 4 هەزار و 500 دینارە .
بەڕێوەبەری چاودێری و بازرگانیی سلێمانی دڵنیاییدایە هاوڵاتییان و وتیشی، “ئەو بەرهەمی ماسییەی لە دەرەوە هاوردەی هەرێمی كوردستان دەكرێت هیچ مەترسییەكی نییە و ئەو وڵاتانەی ماسی لێوە هاوردە دەكرێن ئەگەر گرفتی هەبێت ڕێگەی پێنادرێت بهێَندرێتە هەرێمی كوردستانەوە و ڕێوشوێنی توند بۆ ئەو مەبەستە گیراوەتەبەر”.
