پۆلیسی ڕاپەڕین دۆزینەوەی تەرمێك لەناو ماڵێكدا لە قەڵادزێ ڕادەگەیەنێت و دەڵێت، بەتەنها ژیاوە و چەند ڕۆژێك دەبێت گیانیلەدەستداوە.
بەڕێوەبەرایەتیی پۆلیسی ڕاپەڕین ڕایگەیاند، پاش ئاگادارکردنەوەی هێزەکانی پۆلیسی فریاكەوتن بە بوونی تەرمێک لەناو ماڵێکدا، لەگەڵ تیمەکانی بەڵگە و تاوان گەیشتنە شوێنی مەبەست و دواتر دەرکەوت هاوڵاتیەک بەناوی (ئـ.ح. م.) ڕەگەزی نێر، لەدایکبووی ساڵی 1943، پیشەی کاسب، دانیشتووی قەڵادزێ لەناو ماڵەکەی خۆیدا گیانیلەدەستداوە.
بەگوێرەی زانیارییە سەرەتاییەکان ئەو پیاوە بەتەنیا ژیاوە و سێ بۆ چوار ڕۆژ دەبێ گیانیلەدەستداوە، پۆلیسی ڕاپەڕین وادەڵێت.
لە زاری کوڕەکەشیەوە دەڵێت، “باوکی هیچ کێشەیەکی تەندروستی و کۆمەڵایەتی نەبووە”
تەرمەکە ڕەوانەی نەخۆشخانەی گشتیی قەڵادزێ كراوە و پەڕاوی لێکۆڵینەوەش بۆ ڕووداوەکە ڕێکخراوە.
