سەرۆكی ڕێكخراوی یەكێتیی مامۆستایانی كوردستان ڕایدەگەیەنێت، پێشنیازی پەیڕەوكردنی یەكپۆشی بۆ مامۆستایان لە ناوەندەكانی خوێندن نەكراوە، بەڵام لە ڕابردوودا چەند ڕێنماییەك هەبووە، تائێستا لەسەر ئاستی وەزارەت و ڕێكخراوی یەكێتیی مامۆستایانيش باسی لێوەنەكراوە.
عەبدولواحید محەمەد سەرۆكی ڕێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای ڕاگەیاند، پەیڕەوكردنی سیستمی یەكپۆشی بۆ خوێندكاران لە ڕابردوودا لە زانكۆكاندا هەبووە و ئێستا كە باسی لێوەدەكرێت بە ڕاپرسی یەكلادەكرێتەوە، بەڵام بۆ ناوەندەكانی خوێندن كە مامۆستایانیش یەكپۆشبن تائێستا ئەو پێشنیازە لەسەر ئاستی وەزارەتی پەروەردە و ڕێكخراوەكەشمان باسی لێوەنەكراوە.
ئاشكرایكرد، پێشتر ڕێنمایی هەبووە مامۆستایانی ژن جۆرە جلوبەرگێك لەبەر نەكەن كە سەرنجی خوێندكار ڕابكێشێت، بەڵام بابەتی یەكپۆشی بۆ مامۆستایان لە سیستمی وەزارەتی پەروەردە و یاساكاندا نییە و ئەگەر باسی لێوەبكرێت ڕەنگە بۆچوونی جیاواز هەبێـت.
