سەرۆکی ئەنجومەنی گشتیی ڕاژە دەڵێت، دۆسیەی سەرجەم فەرمانبەرانی هەرێم دەکرێت بە ئەلیکترۆنی و ڕۆڵی گرنگی دەبێت له به‌رزكردنه‌وه‌ی پلەی فه‌رمانبه‌راندا.
سیراج بارزانی سەرۆکی ئەنجومەنی گشتیی ڕاژەی حکومەتی هەرێمی کوردستان ڕایگەیاند، “فەرمانبەری ڕاستەقینە پێویستە شایستەی کارگێڕی و دارایی خۆی وەربگرێت” و وتی، كاری لە پێشینەی ئەنجومەنەكەیان بە ئەلیکترۆنیکردنی دۆسیەی فەرمانبەرانە.
سەرۆکی ئەنجومەنی گشتیی ڕاژە لێدوانی بۆ میدیای پارتی داوە و ڕایگەیاندووە، بە ئەلیکترۆنیکردنی دۆسیەی فەرمانبەران “بۆ شەفافکردن و ئاشکراکردنی ناڕێکییە کارگێڕییەکانە، بەم هەنگاوە فەرمانبەری بندیوار و فەرمانبەری شایستە لە یەكتر جیادەکرێنەوە”.
دووپاتیكردەوە كە پرۆسەی بە ئەلیکترۆنیکردنی دۆسیەی فەرمانبەران دەستیپێکردووە و “لە تەمەنی ئەم کابینەیەدا پرۆسەكە تەواودەبێت”.
بەپێی وتەی سیراج بارزانی، دۆسیەی کەسیی فەرمانبەران کەموکوڕیی زۆری هەیە و زۆر فەرمانبەریش دۆسیەیان فەوتاوە، بەڵام بە ئەلیكترۆنیكردن دۆسیەكان لە فەوتان دەپارێزێت.
