سوپای تورکیا و گروپەكانی هێرشێکی بەرفراوانیان بۆ سەر ڕۆژئاوای کوردستان دەستپێکردەوە و لەیەککاتدا چەندین ناوچەیان تۆپبارانكرد و زیانی گیانیش هەیە.
ئاژانسی هاوار نیوز، بڵاویکردووەتەوە، سوپای تورکیا گروپەكانی لە بەیانی ئەمڕۆوە دەستیان بە تۆپبارانکردنی ناوچەکانی زرگان، تلتەمر، تلڕەفعەت و ڕێگای نێوان تلتەمر- قامیشلۆ كردووە.
باسی لەوەشكردووە، سوپای تورکیا دەیان گوندی ئەو ناوچانە و سەنتەری ناوچەی تلڕەفعەتی تۆپباران كردووە و چەندین گوللـەتۆپیشیان ئاراستەی ئەو ناوچانە کردووە.
لە تۆپبارانەکەی سەر تلتەمردا هاوڵاتییەک گیانیلەدەستدا و چوار هاوڵاتیی دیكەش برینداربوون، کە دوانیان ژنن، هەروەها سەربازێکی سوپای سوریا کوژراوە و چوار سەربازیش برینداربوون.
هەر بەهۆی تۆپبارانەكەوە سێ سەربازی سوپای سوریا كوژران و چواری دیكەش برینداربوون.
