وەزیری پێشمەرگە ڕایگەیاند، لە یاسای چاكسازیدا هەنگاوی گەورە و كاریگەرمان ناوە كە دەرئەنجامەكەی باشتركردنی ژیان و گوزەرانی پێشمەرگەیە و دەشڵێت، ” نزیكەی هەشت ملیار دینارمان لە ساڵێكدا گەڕاندووەتەوە بۆ خەزێنەی حكومەت”.
شۆڕش ئیسماعیل، وەزیری پێشمەرگە ڕایگەیاند، ” لە سێ ساڵی كاركردنمان لە وەزارەتی پێشمەرگە، پاڵپشت بە ڕاسپاردەكانی كارنامەی حكومەت لە یاسای چاكسازی، هەنگاوی گەورە و كاریگەرمان ناوە كە دەرئەنجامەكەی باشتركردنی ژیان و گوزەرانی پێشمەرگە و گەشەسەندنی زیاتری هێزی پێشمەرگەی كوردستان بووە كە توانراوە لە دابەشكردنی مووچە بە ئەلیكترۆنی بكرێت و لە ڕێگای چەكی بانكی و كردنەوەی ئەژماری بانكییەوە مووچە دابەشبكرێت و تا ئێستا 33هەزار و 382 ئەفسەر و پلەدار و پێشمەرگە بە شێوەی چەكی بانكی مووچە وەردەگرن.”
ڕاشیگەیاند، ڕێگریمان لە بەهەدەردان كردووە و نزیكەی هەشت ملیار دینارمان لە ساڵێك گەڕاندووەتەوە بۆ خەزێنەی حكومەت و نزیكەی 14 ملیار دینارمان بۆ هاوكاری و تێچووی چارەسەری بریندارانی جەنگ و گەڕاندنەوەی بەشێك لەقەرزی كەڵەكەبووی سەر وەزارەت خەرجكردووە و پلانی كاركردن بەشێوەی ئەلیكترۆنی ئامادەكراوە كە لە ڕێگای گەورەترین كۆمپانیا كە بودجەكەی لە لایەن ئەمریكاوە تەرخانكراوە.
