زانایان كۆنترین سووتانی دارستانەكان ئاشكرادەكەن كە 430 ملیۆن ساڵ لەمەوبەر ڕوویانداوە و دەڵێن، لە كۆندا قارچك و كەڕووەكان نۆ مەتر درێژبوون.
لە ڕێگەی نیشتووی خەڵووزەوە لە وێڵز و پۆڵەندا كە تەمەنیان 430 ملیۆن ساڵە، زانایان كۆنترین گڕتێبەربوونی دارستانەكانی جیهان ئاشكرادەكەن و شێوەی سروشت و ژیان لە چاخی سیلۆریدا دەخەنەڕوو.
بەپێی وتەی زانایانی خۆرئاوا، 430 ملیۆن ساڵ لەمەوبەر و لە ڕێگەی ڕووەكی زۆر كورت و گیای مامناوەندەوە كە درێژییەكەی تا ئەژنۆ یاخود كەمەری مرۆڤ بووە، ئاگركەوتووەتەوە و بووەتەهۆی سووتانی دارستانەكان.
ئییان گلاسپۆل زانای ڕووەكناس كە پسپۆڕی ڕووەكە كۆنەكانە دەڵێت، ژیانی سروشت لە ڕابردووی دووردا درەخت بەسەریدا زاڵنەبووە، بەڵكو قارچك و كەڕووەكان كە ئەو كات درێژیی هەندێكیان نۆ مەتر بووە، دارستانەكانیان پێكهێناوە و بەهۆی ئاگركەوتنەوەوە سووتاون.
