تەندروستیی سلێمانی بڕیاریدا نەخۆشخانەیەکی دیکە بۆ حاڵەتەکانی سکچوون و ڕشانەوە بەڕووی هاوڵاتییاندا بكرێتەوە.
سامان شێخ لەتیف وتەبێژی بەڕێوەبەرایەتیی گشتیی تەندروستیی سلێمانی ڕایگەیاند، بە ئامانجی پێشوازیکردن لە نەخۆش و چارەسەرکردنیان بڕیاردرا نەخۆشخانەی (شەهید دكتۆر هێمن) ناسراو بە جمهورییەكە بەڕووی هاوڵاتییاندا بكرێتەوە بۆ هەر کەیس و حاڵەتێکی سکچوون و ڕشانەوە.
وتیشی، لە كاتژمێر 8ی بەیانیی سبەینێ (6/15)وە هاوڵاتییان دەتوانن سەردانی نەخۆشخانەكە بكەن.
لەگەڵ گۆڕینی کەشوهەوا و بەرزبوونەوەی پلەکانی گەرما ژمارەیەكی زۆری حاڵەتی سکچوون و ڕشانەوە لە نێو گەورەساڵان و منداڵاندا بڵاوبۆتەوە، وەك ئەوەی وتەبێژی تەندروستیی سلێمانی ئاماژەی پێداوە.
لە زاری پزیشکان و پسپۆڕانی تەندروستیش ڕێنماییەكانی خۆپارێزی دیاریكردووە، كە بریتین لە:
1- بەکارنەهێنانی ئەو بەروبومانەی بەئاوی پیس ئاو دەدرێن
2- شووشتنەوەی سەوزە و میوە بەباشی بە ماددەی پەرمەنگەناتی پۆتاسیۆم
3- بەکارنەهێنانی ئەو خواردن و خواردنەوانەی دڵنیانیت لە پاکوخاوێنی
4- دڵنیابوون لە سەرچاوەی ئاوی خواردنەوە و پاکڕاگرتنی
5- شوشتنی دەستەکان بەباشی بە ئاوسابوون دوای دەستلێدان لەو کەرەستانەی دڵنیانیت لە پاکییان.
