ژنێكی عێراقی لە كامپی هۆل بە سەربڕدراوی دۆزرایەوە و تەرمەكەی فڕێدراوەتە دۆڵێكەوە.
حاڵەتەكانی كوشتن لەناو كامپی هۆل لەلایەن شانە نووستووەكانی داعشەوە زیادیانكردووە، زۆربەی قوربانییەكان عێراقین و بەشێكیان ژنانن.
ڕوانگەی سوری بۆ مافەكانی مرۆڤ ئەمڕۆ دووشەممە بڵاویكردەوە، “ژنەكە سەری لە لاشەی جیاكراوەتەوە و هەردوو دەستی بەستراونەتەوە و شوێنەواری ئەشكەنجەدانی وەحشیگەرانە بە جەستەیەوە دیارە”.
كوشتنی ژنە عێراقییەكە شەشەم حاڵەتی لەو جۆرەیە لەم مانگەدا لەناو كامپی هۆل. كامپەكە لە حەسەكەی ڕۆژئاوای كوردستان-ـە و شوێنی نیشتەجێبوونی بەشێك لە ئەندامانی داعش و خێزانەكانیانە، مەترسیداریی بارودۆخی كامپەكە لە هەڵكشاندایە و لە سەرەتای ئەمساڵەوە 17 كەس لەوێ كوژراون، یەكێكیان كارمەندی ڕێكخراوی مانگی سووری كوردی بووە و هەشتیان عێراقی بوون.
ڕاپۆرتەكان لەبارەی بارودۆخی هۆل دەڵێن، سەرباری ڕێوشوێنە ئەمنییە توندەكانی ئاسایشی ڕۆژئاوا، شانە نووستووەكانی داعش تاوانی كوشتن لەناو كامپەكەدا ئەنجامدەدەن.
