هەسەدە، وەڵامی ھەڕەشەکانی ئەردۆغان دەداتەوە لەبارەی دەستپێکردنی ھێرشی نوێی سەربازیی لە سوریا و دەڵێت، ھەڵسەنگاندن بۆ ئاستی ھەڕەشەکانی ئەنقەرە دەکەن.
ھێزەکانی سوریای دیموکرات “ھەسەدە”، لە ڕاگەیەندراوێكدا لەبارەی هەڕەشەكانی ئەمدواییەی ئەردۆغان ئاماژەی بەوەكردەووە، ھیچ گۆڕانكارییەکی ستراتیژیی بەسەر دابەشکردن و بڵاوبوونەوەی ھێزە نێودەوڵەتییەكان لە ناوچەکانی باکوور و ڕۆژھەڵاتی سوریا نەھاتووە.
پێشیوایە، نمایشکردنی ھێزی داگیرکەر لە لایەن تورکیاوە، لە چێوەی ھەوڵەکانی لێدانە لە سەقامگیریی و ھەوڵدانە بۆ چالاککردنەوەی پاشماوەکانی داعش لەو ناوچەیە.
ھەسەدە جەختیشی كردووەتەوە، ھێزەکانیان ھەڵسەنگاندن بۆ ئاستی ھەڕەشە کرداریی و چاوەڕوانکراوەکانی تورکیا دەکەن و لەگەڵ ھێزە نێودەوڵەتییەکانیش زانیاریی ئاڵوگۆڕ دەکەن.
