ئەنجومەنی نوێنەرانی عێراق كۆدەبێتەوە، خوێندنەوەی یەكەم بۆ پڕۆژەیاسای قەدەغەكردنی ئاساییكردنەوەی پەیوەندی لەگەڵ ئیسرائیل دەكرێت و یاساكە بەدڵی بارزانی نییە.
فەرمانگەی ڕاگەیاندنی ئەنجومەنی نوێنەرانی عێراق، كارنامەی دانیشتنەكەی ئەمڕۆی ئەنجومەنەكەی بڵاوكردووەتەوە و بڕیارە كاتژمێر 11:00 ئەنجام بدرێت.
لە بڕگەی یەكەمی كارنامەی دانیشتنەكەدا هاتووە، خوێندنەوەی یەكەم بۆ پڕۆژەیاسای قەدەغەكردنی ئاساییكردنەوەی پەیوەندی لەگەڵ ئیسرائیل، كە بە(قەوارەی سەهیۆنی) ناوبراوە، دەكرێت و لە 10 ماددە پێكهاتووە.
بڕگەی دووەمی دانیشتنەكەش دەنگدانە لەسەر پێكهێنانی لیژنە هەمیشەییەكان.
دیار نییە لە پڕۆژەیاساكەدا چ جۆرە پەیوەندییەك لەگەڵ ئیسرائیل قەدەغەدەكرێت و پەیوەندییە بازرگانییەكان دەگرێتەوە یان تەنها پەیوەندییە دەوڵەتی و دیپلۆماسییەكانە.
قسەكردنی ئەنجومەنی نوێنەرانی عێراق لەبارەی پرسێكی لەو شێوەیە لەكاتێكدایە، هەرێمی كوردستان بەشێك لە نەوتەكەی بە ئیسرائیل دەفرۆشێت.
