سەندیكای پزیشكانی عێراق هەڕەشەی گرتنەبەری ڕێوشوێنی توند بەرامبەر بە سەنتەرەكانی جوانكاری دەكات و دەڵێت، “كۆتایی بەو بێسەروبەری و پشێوییە دەهێنین”.
جاسم عەزاوی نەقیبی سەندیكای پزیشكانی عێراق ڕایگەیاند، زۆرینەی سەنتەرەكانی جوانكاری لەلایەن كەسانێكەوە بەڕێوەدەبرێن كە پزیشك نین و لە دەرەوەی وڵاتەوە هاتوون و ئەو كارە دەكەن.
ماوەیەكە چەندین كەس بەهۆی نەشتەرگەریی جوانكارییەوە لە سەنتەرەكانی جوانكاری لە شارەكانی عێراقدا مردوون و چەندین كەسیش دووچاری شێواوی و گرفتی تەندروستی بوونەتەوە.
عەزاوی جەختیكردەوە كە بەشێكی زۆری سەنتەرەكانی جوانكاری مۆڵەتیان نییە و زۆرینەیان لە بەغدادن، “بۆیە كۆتایی بەو پشێوییە دەهێنین و بەمنزیكانە هەڵمەتێك لە هەموو شارەكان بەرامبەر بەو سەنتەرانە بەرپادەكەین و دایاندەخەین”.
