ئەنجومەنی پیرانی ئەمریكا، دەیەوێت ئیدارەی وڵاتەكەی پابەندبكات بەوەی هەر ڕێككەوتنێك لەگەڵ ئێراندا بكات، چاوپۆشی لەو وڵاتە نەكات و سوپای پاسداران لە لیستی تیرۆر دەرنەكات.
دۆسیەكە بە دەنگدانی زۆرینەی ئەندامانی ئەنجومەنی پیرانی ئەمریكا هێنرایەوە سەر شانۆی سیاسیی نێوان ئەمریكا و ئێران، 62 ئەندام بەرامبەر بە 33 ئەندامی ئەنجومەنەكە دەنگیان دا بە پڕۆژە پێشنیازێك بۆ ئەوەی دواتر بكرێت بە پڕۆژە یاسا و لەلایەن ئەنجومەنی نوێنەرانەوە پەسەندبكرێت.
ناوەڕۆكی پڕۆژە پێشنیازەكە جەختدەكاتەوە لەوەی ئەگەر ئەمریكا هەر ڕێككەوتنێك لەبارەی چەكی ئەتۆمییەوە لەگەڵ ئێراندا بكات، ئەوا چاوپۆشی نەكات لەو چالاكییانەی ئێران كە “سەقامگیری تێكدەدەن، لەوانە مووشەك و تیرۆر و خۆدزینەوە لە سزاكان”.
پڕۆژە پێشنیازەكەی ئەنجومەنی پیرانی ئەمریكا دەڵێت، نابێت لە ئەگەری گەیشتنی ئەمریكا و ئێران بە ڕێككەوتنی ئەتۆمی، هیچ سزایەكی سەر سوپای پاسداران هەڵبگیرێت و نابێت ئەو گروپە چەكدارە لە لیستی تیرۆر دەربهێنرێت.
