بڕیارە ئەمڕۆ بەغداد میوانداریی یەكەم كۆبوونەوەی نێوان وەزارەتی نەوت و شاندێكی حكومەتی هەرێمی كوردستان بكات لەبارەی بڕیارەكەی دادگای فیدراڵی بۆ تاوتوێكردنی دۆسیەی نەوت.
بەپێی زانیارییەكانی تۆڕی میدیایی ئێستا، كۆبوونەوەكەی شاندی هەرێم و وەزارەتی نەوتی عێراق بۆ گفتوگۆ كردن لەسەر ڕێوشوێنە جێبەجێكارەكانی بڕیاری دادگای فیدراڵی و ڕێككەوتن لەسەر میكانیزمێكی نوێ دەبێت.
هەر بەپێی زانیارییەكان، وەزارەتی نەوتی عێراق لیژنەی تایبەتی داناوە بۆ ئامادەكردنی نەخشەڕێگایەك بۆ گفتوگۆكردن لەسەر سەرجەم دۆسیەكانی كەرتی نەوتی هەرێم و لەماوەی ڕابردووشدا كۆبوونەوەی چڕوپڕی لەگەڵ پسپۆڕانی ناوخۆ و نێودەوڵەتی و ڕاوێژكارە تایبەتمەندەكان بۆ ئەو مەبەستە ئەنجامداوە.
