سەركردەیەكی هاوپەیمانیی فەتح ڕایدەگەیەنێت، ڕێبەر ئەحمەد نابێتە سەرۆك كۆماری عێراق و دەڵێت،”هاوپەیمانێتییەكەیان ئەجێندای دەرەكییە و خزمەت بەپێكهاتەكانی عێراق ناكات”.
ئەسعەد مرشدی،سەركردە لە هاوپەیمانيی فەتح،لەلێدوانێكدا بە تۆڕی میدیایی ئێستای ڕاگەیاند، بڕواناكەم بۆ كۆبوونەوەكەی سبەینێی ئەنجومەنی نوێنەرانی عێراق ڕێژەی یاسایی تەواوببێت و ڕێبەر ئەحمەد ببێتە سەرۆك كۆمار، وتیشی “ئەگەر كۆبوونەوەكە ئەنجامبدرێت و ڕێبەر ئەحمەد دەنگی سێ لایەنە هاوپەیمانێتییەكە بە دەستبهێنێت ئەوا مەترسییە لەسەر پێكهاتەكان و گەلی عێراق”.
ئاماژەی بەوەكرد،”پارتی پۆستی سەرۆك كۆمار وەربگرێت هیچ خزمەتێك بە هەرێمی كوردستان ناكات و هەرچی خێر و بێری هەرێم هەیە پارتی دەستیبەسەردا گرتووە و هاوڵاتییانی هەرێمی كوردستان لێی سوودمەندنەبوون ، ئەگەر سەرۆك كۆمار وەربگرێت بەهەمان شێوە هەر خۆیان سوودمەند دەبن”.
ئەو سەركردەیەی هاوپەیمانيی فەتح باسی لەوەكرد،” لای هەمووان ڕوونە هاوپەیمانی سێقۆڵی”سەدر، هاوپەیمانییەكەی حەلبووسی و پارتی ئەجێندای دەرەكییە و خزمەت بە عێراق و پێكهاتەكانی ناكات”.
