بەر لە داواكردنیان لەلایەن دادگاوە عەبدوڵای كوێخا موبارەك و كوڕ و برا و ئامۆزاكانی چەمچەماڵ-یان جێهێشت و بەپێی زانیارییەكان بەرەو هەولێر هەڵهاتوون، وتەبێژی پۆلیسی سلێمانیش دەڵێت، ئەو دەنگۆیە هەیە.
شەوی 19ی ئازار لە قەزای چەمچەماڵ تەقە لە کارمەندێکی ئاسایش بەناوی (محەمەد عوسمان) کرا و ڕۆژی دواتر بەهۆی سەختیی برینەكەیەوە گیانیلەدەستدا.
دوابەدوای ڕووداوەكە لەلایەن دادوەرەوە فەرمانی دەستگیركردن بۆ عەبدوڵای کوێخا موبارەک، دوو کوڕی، دوو برای و دوو ئامۆزای دەرچوو، بەهۆی ئەوەی کوڕێكی عەبدوڵا بەناوی (بتوێن) بە تۆمەتباری سەرەكی ڕووداوەكە دادەنرێت.
بەڵام بەر لە دەرچوونی بڕیارەكەی دادگا تۆمەتبارە داواكراوەكان لە چەمچەماڵ هەڵاتن و بەپێی زانیارییەكان كە لە چەند سەرچاوەیەكەوە دەست تۆڕی میدیایی ئێستا كەوتوون، سەرجەم تۆمەتباران خۆیان گەیاندووەتە هەولێر.
سەركەوت ئەحمەد، وتەبێژی پۆلیسی سلێمانی بە تۆڕی میدیایی ئێستای ڕاگەیاند، لە دادگاوە فەرمانی گرتنیان گشتاندنی پێدەكرێت تا تۆمەتباران لەهەر شوێنێك بینران، دەستگیربكرێن.
دەربارەی هەڵهاتنیشیان بۆ هەولێر وتەبێژەكەی پۆلیس وتی، “ئەو دەنگۆیە هەیە و بەوانیش وتراوە، هێزەكانی پۆلیس لێكۆڵینەوە و بەدواداچوون دەكەن”.
