كەشناسیی سلێمانی ڕایدەگەیەنێت، ئەو لەرینەوەیەی شەوی ڕابردوو لە سلێمانی ڕوویدا بەهۆی بومەلەرزەوە بووە كە ناوەندەكەی لە ناوچەی سیتەك بوو.
ئاسۆ كەمال، بەڕێوەبەری كەشناسی و بومەلەرزەزانی سلێمانی بە تۆڕی میدیایی ئێستای ڕاگەیاند، كاتژمێر 1:57ی شەوی ڕابردوو بومەلەرزەیەك بە گوڕی 2.2 پلەی ڕێختەر لە ناوچەی سیتەك لە سلێمانی ڕوویداوە.
وتیشی، بومەلەرزەكە لە قوڵایی 15 كیلۆمەتر بووە و لەلایەن دانیشتووانی سلێمانی و ناوچە نزیكەكانی دەوروبەری هەستیپێكراوە.
“ئەمساڵ و ساڵی پار چەند جارێك بومەلەرزە لە هێڵی چەمچەماڵ و بازیان ڕوویداوە، ئەوەی ئەمشەویش درێژكراوەی ئەو درزانەیە كە دەگاتە ناوچەی سیتەك و شاخی ئەزمەر” وەك ئەوەی ئاسۆ كەمال ڕوونیكردەوە.
ئاماژەی بەوەشكرد، كاتژمێر 8:05 خولەكی بەیانی ئەمڕۆش بومەلەرزەیەكی دیكە بە گوڕی 3.7 پلەی ڕێختەر لە قەسری شیرین ڕوویداوە و لە خانەقین و چەند ناوچەیەكی دیكە هەستیپێكراوە.
بوومەلەرزەكەی سلێمانی بە ماوەیەكی كەم پاش هێرشە مووشەكییەكەی سەر هەولێر بوو، بۆیە بەشێك لە هاوڵاتییان گومانی ئەوەیان دەكرد لەرینەوەكە بەهۆی هێرشێكی هاوشێوەوە بووبێت.
