كۆبوونه‌وه‌ى هه‌ردوو وه‌زیرانى ڕوسیا و ئۆكرانیا له ئه‌نتاڵیا كۆتاییهات و سێرگی لاڤرۆڤیش جه‌خت له به‌رده‌وامى گفتوگۆكان ده‌كاته‌وه و ده‌ڵێت، ڕوسیا سووره له‌سه‌ر ئه‌وه‌ى له ڕێگه‌ى دانوستانه‌وه بگاته ڕێككه‌وتن
پاش كۆبوونه‌وه‌كه‌یان له كۆنگره‌یه‌كى ڕۆژنامه‌وانیدا سێرگی لاڤرۆڤ، وەزیری دەرەوەی ڕوسیا ڕایگه‌یاند، ڕوسیا سووره له‌سه‌ر ئه‌وه‌ى له ڕێگه‌ى دانوستانه‌وه بگاته ڕێككه‌وتن له‌گه‌ڵ ئۆكرانیا، به‌ڵام جه‌ختله‌وه‌ده‌كاته‌وه له‌باره‌ى ئاگربه‌سته‌وه هێشتا ڕێكنه‌كه‌وتوون.
ده‌رباره‌ى كۆبوونه‌وه‌ى نێوان پوتین و زیلینسكى، وه‌زیری ده‌ره‌وه‌ى ڕوسیا له كۆنگره ڕۆژنامه‌وانییه‌كه‌یدا وتى، سەرۆکی ڕوسیا كۆبوونه‌وه ڕه‌تناكاته‌وه له‌گه‌ڵ سەرۆکی ئۆکرانیا، بەڵام هەندێک ئامادەکاریی هەن کە دەبێت تەواوبکرێن.
هه‌روه‌ها داواکاریی زیلینسکیش بۆ کۆبوونەوە لەگەڵ پوتین بە “خۆدەرخستن” ناودەبات.
ئاماژه‌ى به‌وه‌شكرد، وڵاته‌كه‌ى له‌گه‌ڵ جه‌نگى ئه‌تۆمیدا نییه له‌گه‌ڵ وڵاتانى خۆرئاوادا.
له به‌رامبه‌ریشدا دیمیترۆ کولێبا، وەزیری دەرەوەی ئۆکرانیا له كۆنگره‌یه‌كى ڕۆژنامه‌وانید وتى، لەگەڵ ڕوسیا ڕێککەوتوون کە بەردەوامبن لە هەوڵەکانیان بۆ دۆزینەوەی چارەسەرێک بۆ پرسی هاوکاریی مرۆیی لە ئۆکراینا.
ئامادەیی خۆشیی دەربڕی کە دووبارە لەگەڵ لایەنی ڕوسی کۆببێتەوە ئەگەر گفتوگۆی جددی لەسەر دۆزینەوەی ڕێگەچارە و چارەسەری دۆخەکە بکرێت.
