وەزارەتی بەرگریی ڕوسیا ڕایگەیاند، لە هەردوو شاری ماریۆپۆل و ڤۆلنوڤاخا، كە دەكەونە باشووری خۆرهەڵاتی ئۆكرانیا، شەڕی ڕاگرت.
وەزارەتەكە دەڵێت، هەنگاوی ڕاگرتنی شەڕ لەو دوو شارە بۆ كردنەوەی ڕێڕەوی مرۆییە، بۆ دەرفەتدان بە هاوڵاتییان بۆ چوونە دەرەوەیان، شەڕڕاگرتنەكەش لە كاتژمێر 10:00ی ئەم بەیانییە بەكاتی مۆسكۆ (هاوكاتە لەگەڵ هەرێمی كوردستان) چووەتە بواری جێبەجێكردن.
كردنەوەی ئەو ڕێڕەوە مرۆییانە دوای ڕێككەوتنی هەردوو لایەنی ئۆكرانی و ڕوسی دێت لەسەر ئەو پرسە، لە میانی گەڕی دووەمی گفتوگۆكانی نێوانیان.
وەك ئەوەی وەزارەتی بەرگریی ڕوسیا دەڵێت، لەگەڵ لایەنی ئۆكرانی لەسەر ئەو ڕێگایانە ڕێككەوتوون كە هاوڵاتییانی مەدەنی بەكاریدەهێنن بۆ خۆدەربازكردن.
