نرخی نەوت لە بازاڕەكانی جیهان بەردەوامە لە بەرزبوونەوە و ئەمڕۆ خاوی برێنت بە سەروو 117 دۆلار بۆ هەر بەرمیلێك مامەڵەی پێوەكرا.
مەترسییەكان لەبارەی پەككەوتنی بازرگانی و كێشەكانی ڕەوانەكردن بەهۆی سزاكانی سەر ڕوسیا هۆكاری بەرزبوونەوەی نرخەكەن.
جگەلەوەی ڕێكخراوی وڵاتانی هەناردەكاری نەوت (ئۆپیك) و هاوپەیمانەكانی، لەنێویشیاندا ڕوسیا، بڕیاریاندا بە هێشتنەوەی زیادەی بەرهەمهێنان بە بڕی 400 هەزار بەرمیلی ڕۆژانە لەم مانگەوە، سەرەڕای بەرزبوونەوەی نرخ، بەبێ لەبەرچاوگرتنی قەیرانی ئۆكرانیا و پشتگوێخستنی داوای بەكاربەران بۆ زیادكردنی بەرهەم.
گرێبەستە دواخراوەكانی خاوی برێنت 3.62 دۆلار بەرزبووەوە و گەیشتە 117.18 دۆلار بۆ هەر بەرمیلێك، ئەمەش بەرزترین نرخیەتی لە ئابی 2013ەوە.
خاوی ڕۆژئاوای تەكساس-یش گەیشتە 113.88 دۆلار بۆ هەر بەرمیلێك، بە بەرزبوونەوەی 3.28 دۆلار دوای ئەوەی گەیشتە بەرزترین ئاستی خۆی لەماوەی 11 ساڵی ڕابردوودا.
