ڕوسیا بەتەواوەتی شارێكی لە باشووری ئۆكرانیا كۆنترۆڵكرد، بۆردومانی چڕی چەند شارێكی دیكەش دەكات، بە كیێڤی پایتەختەوە.
وەزارەتی بەرگریی ڕوسیا بەیانی ئەمڕۆ ڕایگەیاند، هێزەكانیان چوونەتە شاری خێرسۆن لە باشووری ئۆكرانیا و كۆنترۆڵیان كردووە.
وەزارەتە ڕوسییەكە دەشڵێت، لەگەڵ بەرپرسانی شارەكە لە گفتوگۆدان بۆ ئەوەی ژیان لە شارەكە ئاسایی بێت و یاسا بەرقەرار بێت و تەواوی دامەزراوەكان كاری خۆیان بكەن.
خێرسۆن، كە دەكەوێتە باشووری ئۆكرانیاوە، هاوسنوورە لەگەڵ نیوەدوورگەی كریمیا، كە لە بنەڕەتدا لەژێر كۆنترۆڵی ڕوسیادایە.
ڕوسیا لە بۆردومانكردنی چەند شارێكی دیكەش بەردەوامە و چڕتریكردووەتەوە، بەتایبەت لەسەر شارەكانی كیێڤی پایتەخت، خاركیڤ لە باكووری خۆرهەڵات و هەروەها ماریۆپۆل، كە ئەمەی دواییان دەكەوێتە تەنیشت خێرسۆنی كۆنترۆڵكراوەوە.
بەرپرسانی شاری ماریۆپۆل وا باسی بۆردومانەكانی ڕوسیا دەكەن، كە ئەوەندە چڕە تەنانەت ناتوانن یارمەتی بریندارەكان بدەن و تەرمی قوربانییەكان بگوازنەوە، وەك ئەوەی میدیای ئۆكرانیا و جیهانی باسیدەكەن.
بەرپرسانی شاری خاركیڤ-یش ئاماری قوربانییانی مەدەنییان بڵاوكردووەتەوە، دەڵێن، بەهۆی بۆردومانەكانی ڕوسیاوە لە 24 كاتژمێری ڕابردوودا لانی كەم 21 كەس كوژراون و 112 كەسی دیكەش بریندار بوون.
