هێرشی ڕوسیا بۆسەر ئۆکرانیا هەڕەشەی گرانی و بێخۆراکی لە خەڵکی خۆرهەڵاتی ناوەڕاست و باکووری ئەفریقا دەکات.
بەپێی ڕاپۆرتێکی ڕۆژنامەی تەلەگرافی بەریتانی، گرژیی بارودۆخی نێوان ڕوسیا و ئۆکرانیا نرخی خۆراکی بەرزکردووەتەوە و خێزانەکانی خۆرهەڵاتی ناوەڕاست و باکووری ئەفریقا لە بەردەم ئەگەری گرانی و کەمبوونەوەی خۆراکدان.
ڕاپۆرتەکە ئاماژەی بەوە داوە کە ڕوسیا بە گەورەترین سەرچاوەی گەنم دادەنرێت لە جیهاندا، ئۆکرانیاش بە درێژایی دەیەی ڕابردوو وەک یەکێک لە وڵاتە سەرەکییەکان بۆ هەناردەکردنی گەنم و جۆ دەرکەوتووە، بەپێی چاودێرانیش لە حاڵەتی ڕاوەستانی هەناردەکردن لەم دوو وڵاتەوە لە بارودۆخی جەنگدا، نرخی خۆراکە سەرەتاییەکان لە ناوچەی خۆرهەڵاتی ناوەڕاست و باکووری ئەفریقا بەرزبوونەوەی زیاتر بە خۆیانەوە دەبینن.
ئەمە لە کاتێکدایە کە ئەم ماوەیە نرخی ماددە خۆراکییەکان لە خۆرهەڵاتی ناوەڕاست و باکووری ئەفریقا گەیشتووەتە بەرزترین ئاستی ئەم 10 ساڵەی ڕابردوو، بە ڕادەیەک کە نزیکبووەتەوە لەو ئاستی گرانییەی لە ڕۆژگاری “بەهاری عەرەبی”دا هەبوو.
