وەزارەتی پێشمەرگەی حکومەتی هەرێمی کوردستان سەبارەت بە هێرشەکەی دوێنێی چەکدارانی داعش بۆسەر هێزە عێراقییەکان لە دیالە ڕایگەیاند، دەرکەوتنەوەی ئەو چالاکییە تیرۆریستییانە مەترسیدارە و هەماهەنگیی نێوان پێشمەرگە و هێزە عێراقییەکان پێویستییەکی هەنوکەییە.
لە ڕاگەیەندراوێکدا وەزارەتی پێشمەرگە سەرکۆنەی هێرشەکەی دوێنێی چەکدارانی داعش بۆسەر هێزە عێراقییەکان دەکات، کە بەهۆیەوە 11 ئەندامی هێزە عێراقییەکان کوژران، جەختدەکاتەوە، ئەو کردەوانە ئەرکی پێکەوەیی و هەماهەنگی و هاوکارییەکانی هەردوولا زیاتر دەکات و پێویستییەکی هەنوکاییە.
وەزارەتی پێشمەرگە پێیوایە، “دۆخی ئێستای ناوچەکە و دەرکەوتنەوەی چالاکییە تیرۆریستیەکان و زیندبوونەوەی شانە نووستووەکان مەترسیەکی هەستپێکراوە”، بۆیە داوادەکات، “پێداچوونەوە بکرێت و ڕێوشوێنی جددی بگیرێتەبەر بۆ چڕکردنەوەی هەوڵەکان و کۆکردنەوەی زانیاریی زیاتر لەپێناو ڕاوەدونان و تێکشکاندنی تەواوەتی شانە نووستووەکانی تیرۆریستان”.
