بەهۆی سەرما و دابەزینی پلەكانی گەرماوە، سبەی پێنجشەممە لە زانكۆ و پەیمانگە و ناوەندەكانی خوێندن و زۆربەی فەرمانگەكانی پارێزگای دهۆك و ئیدارە سەربەخۆكانی ڕاپەڕین، زاخۆ و سۆران دەوام ناكرێت و پشووی فەرمی دەبێت.
ئیدارەی ڕاپەڕین ڕاگەیەندراوێکی بڵاوكردەوە و دەڵێت، “بەمەبەستی پاراستن و سەلامەتیی گیانی فەرمانبەران، بڕیارماندا سبەی کە دەکاتە ڕۆژی پێنچشەممە بکرێتە پشووی فەرمی لە سەرجەم دام و دەزگا حکومییەکانی سنوورەکەمان، جگە لە تیمە خزمەتگوزارییەکان و تیمەکانی پاککردنەوە و هێزە ئەمنییەکان”.
بەهەمانشێوە زانكۆی ڕاپەڕین سبەینێی كردە پشوو و ڕایگەیاند، سەرۆكایەتیی زانكۆی ڕاپەڕین ڕۆژی پێنجشەممە (20/1/2022)ی كرد بە پشوو بۆ ئەو بەشانەی لەو ڕۆژەدا دەوامی خوێندنیان هەیە.
لە سنووری ئیدارەی سۆران-یش بەهۆی دابەزینی پلەکانی گەرما و دروستبوونی ئاستەنگیی هاتوچۆوە، سبەی پێنجشەممە کرایە پشوو.
هاوكات دەوامی قوتابخانە، زانکۆ و پەیمانگەکان لە ئیدارەی سەربەخۆی زاخۆ ڕاگیرا و بەهۆی بەفر و سەرماوە سبەی پێنجشەممە پشووی فەرمی دەبێت.
لە پارێزگای دهۆكیش تاقیکردنەوەکانی خوێندنی ئێواران، پیشەیی و ئیسلامی ڕاگیران و لە سەرجەم ناوەندەکانی تری خوێندن لە پارێزگای دھۆک، سبەی پشووی فەرمی دەبێت.
