به‌هۆی ته‌قینه‌وه‌ى بۆرى نه‌وتى هه‌رێم له توركیا نرخى نه‌وت له بازاڕه‌كانى جیهاندا به‌رزبووه‌وه و نرخى به‌رمیلێك برێنت گه‌یشته سه‌روو 88 دۆلار.
شه‌وى ڕابردوو بۆریى نه‌وتى هه‌رێم له شارۆچكه‌ی “پازارجک”ى سه‌ربه پارێزگای مه‌ڕه‌ش له باكووری كوردستان ته‌قییه‌وه، به‌هۆیه‌وه ڕێگای نێوان هەردوو پارێزگای مه‌ڕه‌ش و عه‌نتاب به‌ڕووی هاتوچۆدا داخرا و هه‌نارده‌كردنى نه‌وتیش ڕاگیرا.
ئاژانسی ڕۆیته‌رز بڵاویكرده‌وه، یه‌كێك له هۆكاره‌كانى به‌رزبوونه‌وه‌ى نرخى نه‌وت ته‌قینه‌وه‌ى بۆرى نه‌وتى هه‌رێمه له توركیا، له پاڵ ئه‌وه‌ش هێرشه‌كانى سه‌ر ئیمارات و بڵاوبوونه‌وه‌ى هێزه‌كانى ڕوسیا له‌سه‌ر سنووره‌كان دوو هۆكارى دیكه‌ن بۆ به‌رزبوونه‌وه‌ى نرخى نه‌وت.
ئاژانسه‌كه باسی له‌وه‌شكردووه، به‌یانى ئه‌مڕۆ چوارشه‌ممه له‌گه‌ڵ كردنه‌وه‌ى بازاڕه‌كاندا نرخى یه‌ك به‌رمیل نه‌وتى برێنت بۆ 88.37 دۆلار به‌رزبووه‌ته‌وه.
هاوكات یه‌ك به‌رمیل نه‌وتى خۆرئاواى ئه‌مریكاش بۆ 86.46 دۆلار به‌رزبووه‌ته‌وه.
