دوای چەندین شەپۆلی بارانبارینی یەک لەدوای یەک، لە هەرێمی کوردستان بڕی بارانبارین لە چەند ناوچەیەک ساڵی ڕابردووی تێپەراندووە، شاری سلێمانیش زۆری نەماوە تێیپەڕێنێت.
بەپێی ئاماری فەرمیی کەشناسیی هەرێم، لە شاری سلێمانی ساڵی ڕابردوو 226 ملم باران باریوە، ئەمساڵیش تا ئێستا 197 ملم باران باریوە، بەوەش تەنها 30 ملم باران ماوە بۆ تێپەراندنی بڕی بارانبارینی کۆی ساڵی ڕابردوو.
هەر بەپێی ئامارەکە، بڕی بارانبارین لە قەزای بازیان ساڵی ڕابردووی تێپەڕاندووە، بەجۆرێک ساڵی 2021، 377 ملم باران باریوە، بەڵام ئەمساڵ نزیکەی 460 ملم باران باریوە، بەوەش تا ئێستا نزیکەی 100 ملم باران لە ساڵی ڕابردوو زیاتر باریوە.
هەروەها لە ڕانیە، ساڵی ڕابردوو تەنها 149 ملم باران باریبوو، بەڵام ئەمساڵ گەیشتووەتە 371 ملم باران.
بەپێی ئەو ئامارەی کەشناسیی هەرێم بڵاویکردووەتەوە، لە زۆرینەی قەزا و ناحیەکانی پارێزگای سلێمانی، بڕی بارانبارینی ئەمساڵ تا ئێستا ساڵی ڕابردووی تێپەڕاندووە.
