شانەی ڕاگەیاندنی ئەمنیی عێراق ڕایگەیاند، ئەمڕۆ سێشەممە جارێکی دیکە بە دوو فڕۆکەی بێفڕۆکەوان هێرشکراوەتە سەر بنکەی سەربازیی عەین ئەسەد لە خۆرئاوای عێراق.
شانەی ڕاگەیاندنی ئەمنی ئاماژەی بەوەکردووە، هەدوو فڕۆکە بێفڕۆکەوانەکە لەلایەن سیستمی دژەمووشەکیی بنکەکەوە خراونەتەخوارەوە، هیچ زیانێکیش لە بنکەکە نەكەوتووەتەوە.
بەپێی سەرچاوە عێراقییەکان، ئەو دوو درۆنەی هێرشەکەیان ئەنجامداوە بۆمبڕێژکراوبوون.
دوێنێش دووشەممە بە دوو فڕۆکەی بێفڕۆکەوان هێرشێکی دیکە بۆسەر ناوەندی بەغداد بۆ پاڵپشتیی دیپلۆماسی “بنکەی ڤیکتریی پێشوو” لە فڕۆکەخانەی نێودەوڵەتیی بەغداد ئەنجامدرا.
ئەو درۆنانەی هێرشەکانیان پێئەنجامدرابوو لەسەریان نووسرابوو “چالاکییەکانی تۆڵەکردنەوەی فەرماندەكان”، کە مەبەست لێی تۆڵەکردنەوەی کوژرانی قاسم سولەیمانی و ئەبو مەهدی موهەندیسە، کە لە 3ی کانونی دووەمی 2020دا لەلایەن ئەمریکاوە لە هێرشێکی ئاسمانیدا لەنزیک فڕۆکەخانەی بەغداد کوژران.
